اسلام آباد میں پر امن دھرنا ہو گا، شرکاء ریلیف کے بغیر واپس نہیں آئیں گے، حافظ نعیم الرحمان

گوجرانوالہ میں میڈیا سے بات چیت کرتے ہوئے امیر جماعت اسلامی حافظ نعیم کا کہنا تھا کہ حکومت جب عوام کو بنیادی سہولت فراہم نہیں کر سکتی تو ٹیکس کیوں لگا رہی ہے۔انہوں نے کہا کہ لوگ اپنے گھر کی چیزیں بیچ کر بل ادا کر رہے ہیں، عوام آئی پی پیز سے چھٹکارا چاہتے ہیں، جو لوگوں کا خون چوس رہے ہیں۔امیر جماعت اسلامی حافظ نعیم نے کہا کہ حکومت دھرنے میں رکاوٹ نہ ڈالے، جماعت اسلامی ایک پر امن جماعت ہے، اسلام آباد میں ہمارا پرامن دھرنا ہوگا۔یاد رہے کہ امیر جماعت اسلامی حافظ نعیم الرحمان نے مہنگائی اور بجلی کے بلوں میں بے تحاشا ٹیکسز کیخلاف 26 جولائی کو اسلام آباد میں دھرنا دینے کا اعلان کیا ہوا ہے۔ دوسری جانب جماعت اسلامی کی قیادت اور کارکنان کی پکڑ دھکڑ کی بھی اطلاعات ہیں پولیس نے رات گئے راولپنڈی اور دیگر شہروں میں جماعت اسلامی کے کارکنان اور قیادت کی گرفتاری کیلئے چھاپے مارے اور درجنوں افراد کو گرفتار کر لیا پنجاب حکومت نے امن و عامہ کو جواز بنا کر دفعہ 144 کا نفاذ بھی کر رکھا ہے۔